LEGAZPI CITY—Gadan an sarong Barangay Kagawad kan Barangay Nasisi, Ligao City na pigbistong si Jose D. Buello makalihis na pagbabadilon ini kan dae pa nabibisto na suspetsado.
Segun ki Jurlan Buello, Ligao City councilor asin pinsan kan biktima, sa intrevista kan Bombo Radyo Legazpi, ini binadil sa may parte kan Barangay Nabonton kan kaparehong ciudad mantang pasiring ini sa Barangay Muladbucad Grande.
Basado sa otopsiya, may tama nin bala an biktima sa may parte kan saiyang bitis asin sa parte kan saiyang likod.
Dugang kaini na hanggang sa ngunyan wara pa sindang ideya sa kun siisay an nasa likod kan pambabadil asin kun ano an motibo kan suspetsado.
Sa presente padagos pa an imbestigasyon kan mga otoridad kun sisay an nasa likod kan nasambitang pambabadil.
