LEGAZPI CITY – Wara man nin pigtalaang petsa o timeline kun nuarin matatapos an drug clearing operation kan Albay PNP sa mga barangay na apektado nin droga.
Sa ngunyan, nasa 35% naman na drug-affected barangays an naklarado na sa droga.
Segun ki C/Insp. Arthur Gomez, tagapagtaram kan Albay PNP, pighahalat na sana ninda an mga mapirma sa kasuratan na pwedesir nang maideklarang drug-cleared an sarong barangay.
Alagad warang timeline, posible suboot na matapos ini sa Enero 30 alagad luway-luway nindang ikaklarado an mga ini sa tabang kan mga stakeholders.
Aminado man an opisyal na dae tulos maidedeklarar na drug-cleared an sarong barangay kun warang pirma kan mga signatories na miyembro kan Barangay Anti-Drug Abuse Council (BADAC) asin iba pang stakeholders.
Positibo man an Albay PNP na mauubos an mga barangay na apektado nin droga huli sa nagdo-double time sinda kun saen pigtatabangan na kan Albay PNP an mga municipal/city police stations.
Segun pa digdi, dae basta-basta maki-clear an mga barangay sa Albay huli sa an probinsya an may pinakadakol na numero kan barangay na apektado kan droga.
Maugma man kaining ipigheras na naubos ninda an mga nasa listahan na itinao kan Philippine Drug Enforcement Agency (PDEA) asin nakapagrehistro pa sinda nin newly-identified drug personalities na wara sa listahan kan PDEA.
