LEGAZPI CITY – Nanindogan an mga opisyal kan Brgy. Alcala, Daraga, Albay na warang kasalan an mga residente sa nangyaring pagputol kan suplay kan kuryente kan Albay Power and Enegry Corporation (APEC) sa lugar.
Napag-araman na nasa P9 milyon an babayadang kantidad kan mga consumidores sa current asin arrears sa kan power supply.
Sa intrevista kan Bombo Radyo Legazpi ki Kapitan Cesar Mansos, dae man sinda makapagbayad urog na warang ipigtataong individual billing sa mga residente mantang kuwa kan mother meter kan APEC an ipig-oofrecir na resibo.
Segun pa sa kapitan, taong 2015 kan mabuwag an Barangay Power Association (BAPA) sa Alcala huli ta mawot na kan mga residente nin direktang koneksyon sa power supplier puon pa kan taong 2009.
Ipigtangro man suboot sa barangay council kan panahon an pagkapot sa BAPA kaya inako man kan konseho.
Pigtutubudang kan 2015 man nagpuon an problema mantang nagkapira sa mga konsumidores an direkta nang nagbabayad sa APEC kan magtuntong an 2017.
Nagkaigwa pa nin asemblea tangarig na mapag-urunan na problema asin mabayadan an utang kan barangay.
Alagad maski suboot may ipigsunad nang reklamo, pigputulan man giraray kaya hagad ngonian kan barangay an kaliwanagan sa proseso.
Naghampang man an mga barangay officials asin APEC officials sa Energy Regulatory Commission (ERC) kasuodmang hapon.
