LEGAZPI CITY—Pigtaram kan grupong Bantay Bigas na padagos na mahalangkaw an presyo kan bagas kun padagos na ipigpapaotob an Republic Act 11203 o an Rice Tariffication Law.
Segun ki Cathy Estavillo, an tagapagtaram kan grupong Bantay Bigas, sa intrevista kan Bombo Radyo Legazpi, sa ibong kan mga rason kan gobyerno kun nata naghahalangkaw an presyo kan bagas sinabi kaini na an puno’t dulo kan paghalangkaw iyo an nasambitan na ley.
Dugang kaini na maski ibinaba sa 15% an tariff padagos man liwat an paghalangkaw kan presyo nin bagas.
Sinabi man kan opisyal na kun padagos na ma-import an gobyerno nin bagas gikan sa ibang nasyon ini an mapaluya sa lokal na produksyon nin bagas sa Pilipinas.
Kayang-kaya man suboot kan mga paraoma na gibuhon an produksyon nin bagas para sa mga Pilipino kun piggibong prayoridad kan gobyerno an pagpapakusog kan lokal na produksyon asin an pagsuporta sa mga paraoma.
Mientrastanto, padagos man an pangapudan kan grupo na pakusugon an lokal na produksyon asin dugangan an budget kan Department of Agriculture.
