LEGAZPI CITY — Dae na plano kan pamilya na isairarom pa sa otopsiya an hawak kan biktima makalihis ining madukayang gadan sa laog kan saiyang kwarto.
Binisto an biktima na si Nico Vibal, 36 anyos asin residente kan Purok 4 Barangay San Roque syudad nin Legazpi.
Base sa nagunong impormasyon kan Bombo Radyo Legazpi, nangalas an pamangkin kan biktima na si Aileen Barbudo kun nata duwang aldaw ng dae nagluluwas kan saiyang kwarto an tiyuon.
Huli digdi, napiritan siyang siripon sa kwarto si Vibal asin nahiling an warang buhay na hawak kan tiyuon.
Nagdesisyon an pamangkin na piritong buksan an pintuan kan kwarto sa tabang kan saiyang pinsan.
Sa ginibong pag-iimbestigar kan Legazpi City Police, napag-araman na warang nangyaring foul play sa pagkagadan kan biktima asin posible suboot na inatake ini sa puso sa pagulatan kan alas 9:30 kan Marso 29 hasta Marso 30.
Nagmara na kaya suboot an dugo sa may dungo kan biktima asin namamarong na an bangkay kaini.
Dae na suboot isasairarom pa sa otopsiya an bangkay huli sa natural an kawsa kan pagkagadan.
