Nadukayan an bangkay kan sarong nawawarang lola sa kataid kan mga binulnot na awot sa sarong omahan sa Barangay Del Rosario, Pamplona, Camarines Sur anom na aldaw makalihis na ini ireport na nawawara.
Nabigla an kagsadiri kan omahan kan mahiling an gurang na nakahigda harani sa mga awot na posibleng siya mismo an nagbulnot.
Segun sa kagsadiri, posibleng duman nagkaturog an lola magdamlag huli ta naubos an dara kaining tubig sa plastic bottle.
Tulos man na nagpasiring sa lugar an mga personahes hale sa Pamplona Municipal Police Station (MPS) asin kinumpirmar an pagkabisto kan gurang na babae na si Lola Josefina Olitoquit, residente kan Barangay Santa Cruz, San Fernando, Camarines Sur.
Positibo man siyang pigbisto kan saiyang mga kapamilya.
Sa ngunian, pig-aaram kan mga otoridad an detalye kan saiyang pagkagadan ngani na maaraman an mga kawsa asin kun may imbweltong foul play.
