LEGAZPI CITY- Nahahadit an sarong political analyst na garing nagsi-sentro na sana an isyu sa West Philippine Sea sa agyatan nin debate asin bangayan kan nagkapirang mga opisyal kan gobierno.
Segun ki Atty. Michael Henry Yusingco sa intrevista kan Bombo Radyo Legazpi na posibleng magresulta ini sa pagbabago kan opinyon kan mga Pilipino na nagsi-sentro na sana sa personalidad an orolay sa nasabing teritoryo.
Paliwanag kan opisyal na kun magpapadagos an presenteng diskurso o hamunan, posibleng malingawan na igwang mga lakdang na dapat na pigigibo ngani na pakusugon pa an posisyon asin paninindugan sa West Philippine Sea.
Dugang pa ni Yusingco na an siring na mga dae pagkakasundo sa pagultangan kan mga opisyal kan Pilipinas an garing nagigin pabor sa China.
Aram kaya suboot kan Beijing na madaling diktahan an mga political leaders sa nacion asin mawot kaini na magkaigwa nin pag-iiwal sa pagultangan kan mga lider kan Pilipinas.
An siring na istratehiya suboot an mas nagbebenepisyo sa China urog na pag-abot sa pig-aaragawan na teritoryo.
