LEGAZPI CITY – Inilunsar na kan Ban Toxic an sarong proyekto na matabang sa mga ospital sa pagmanehar nin mga healthcare waste.
Sa intrevista kan Bombo Radyo Legazpi ki Jam Lorenzo, Policy Development and Research Officer kan Ban Toxic Philippines, pig-aapod an nasabing proyekto na Philippine Healthcare Waste and Mercury Management Project.
Saro ining national project katabang an Department of Environment and Natural Resouces (DENR), Environmental Management Bureau (EMB), Department of Health (DOH), mga partner hospitals asin kadakol pang iba.
Segun ki Lorenzo, an United Nations Industrial Development Organization an nagpopondo sa nasabing proyekto.
Obheto kaini na mas mapahiwas asin mapakusog an kapasidad kan mga ospital na imanehar an mga healthcare waste.
Sa katunayan nagkaigwa na an grupo nin site visit sa mga ospital sa Region 2 asin Region 8 kun sain narisa an kakulangan nin storage facility o mga tambakan nin basura.
Dagdag ni Lorenzo na sobrang delikado an mga healthcare waste bako sana sa salud kundi magin sa kapalibutan lalo na kun dae namamanehar nin matanos.
Sinabi kaini na importante an nasabing proyekto ngani na en kasong magkaigwa giraray nin pandemya prepado na an mga ospital sa pagmehar nin healthcare waste.
