Legazpi City- Dagos an ginigibong monitoring kan Toxic watchdog na Ban Toxic para sa pagbakal nin mga produktong pangdekorar ngunyan na kapaskuhan.
Sa intrevista kan Bombo Radyo Legazpi kay Ban Toxic Campaigner , Thony Dizon, sa saindang paglibot asin pagsusuri sa mga produkto na pangpasko nanutaran an nagkapira na igwa man giraray nin mga nakakalason na kemikal na nakakaraot sa salud kan sarong indibidwal.
Sa paglilibot kan grupo nanutaran an nagkapirang mga Christmas light na daeng Import Commodity Clearance o ICC sticker, saro sa mga palatandaan na nag-agi sa tamang proseso an produkto asin iba pang mga bako naayos sa Philippine standard kan mga produkto base sa Department of Trade and industry.
Mientras tanto nanutaran an presensya kan mga nakakaraot na kemikal sa nagkapira pang Christmas Ornaments o pansabit. Nagkapira sa kemikal an posibleng magkawsa nin mga helang arog kan Cancer asin iba pa.
Pinag-inganyar man kan opisyal an mga pinoy na mag-obserbar nin pagre-recyle, asin pagamit nin mga non-toxic materials para dae makaapektar sa mga joven. Dugang pa man kan Toxic watchdog na gumamit nin mga native ornaments para sa eco-friendly celebration kan kapaskuhan.
