LEGAZPI CITY- Nagin matrayumpo an sinagibong bakunahan program kan DOH Catanduanes na isinabay sa pananao nin educational assistance kan Department of Social Welfare and Development.
Segun sa ahensya, haros gabos mga estudyante an nagbale sa programa kun sain nakaresibi an mga ini nin booster shoots mantang nagkukua kan saindang asistensya.
Dakula man an nagin pasasalamat kan DOH Catanduanes sa tabang kan Provincial Social Welfare Development (PSWD), Department of the Interior and Local Government (DILG), asin iba pang mga ahensya para maisagibo an pagbabakuna.
Katakod kaini naglalaom an mga opisyal kan ahensya na magdadakol pa an mga estudyanteng magpapabooster shot urog pang nagpuon na an in-person classes sa nasyun.
Parte an nasabing bakunahan sa PinasLakas program na mas pinakusog na kampanya laban sa COVID-19, kun sain obhetong mairani na an bakuna mismo sa mga tawo.
