LEGAZPI CITY-Nagwalat man nin matinding pagbabaha sa kadakol na komunidad sa Taiwan an bagyong Fung-wong na dating tuminama sa Pilipinas bilang Super Typhoon Uwan.
Bago an tuluyang pagtama kan bagyo sa Taiwan, rinibong katawo man an ipigebakwar kan gobierno mantang sinarado an mga eskwelahan asin mga establisimyento.
Uminabot man sa 51 katawo an natukoy na nagsapar nin manlain-lain na injury huli sa epekto kan nasabing bagyo.
Sa Yilan County, nagkapirang lugar an naekperyensa nin hasta sa 650 millimeter na uran asin nagresulta ini sa lagpas-tawo na pagbabaha kun sain nalubog an haros 1,000 na mga kaharongan.
Sa presente, nagtetenir sa mga evacuation center an labi sa 8,300 na katawo sa Tawain hale sa Yilan asin Hualien County, an duwang banwaan sa lugar na pinakamatinding naapektaran kan bagyo.
Marurumduman na nagluya bilang tropical storm an bagyong Uwan bago ini tuluyang nanalasa sa Taiwan, pirang aldaw makalihis na manalasa bilang super typhoon sa Pilipinas.
Sa presente, nasa tropical depression category na ini asin padagos na nagpapauran sa nagkapirang parte kan Taiwan.
