Namantenir kan bagyong Pilandok an kusog kaini mantang haros dae naghihiro sa kadagatan sa sirangan kan Extreme Northern Luzon, basado sa pinakabagong datos kan state weather bureau.
Huring nahiling an sentro kan bagyo sa distansyang 1,120 kilometro sa sirangan kan Extreme Northern Luzon na may sustained winds na 55 kilometers per hour harani sa sentro asin pagbugso na nag-aabot sa 70 kilometers per hour.
Kasabay kaini, padagos na nakaka apektar an Southwest Monsoon o Hanging Habagat sa dakulang parte kan Luzon asin sa kanlurang parte kan Visayas na pinaglalaoman na magdadara nin mga pag-uran.
Afuera sa Bagyong Pilandok, pigbabantayan man kan state weather bureau an sarong tropical cyclone sa luwas kan Philippine Area of Responsibility na nasa 1,180 kilometro sa kanluran kan Extreme Northern Luzon.
Mientras tanto, padagos man an pagsubaybay sa Tropical Depression Saudel, na may lokal na pangaran na Obet, na huring nasa distansyang 485 kilometro sa kanlurang-hilagang-kanluran kan Itbayat, Batanes.
