LEGAZPI CITY — Arestado an apat na durugista sa ipigkondusir na buy bust operation kan Guinobatan Municipal Police sa Relocation Site, Sitio Kangao Purok 3 Bgy. Quitago, sa banwaan kan Guinobatan, Albay.
Sa intrevista kan Bombo Radyo Legazpi ki PC/Insp. Jason Rey Colico, hepe kan nasabing istasyon, nagsagin sagin na buyer an sarong pulis na nagbakal nin sarong sachet kan pigtutubudan shabu sa sarong Jean Rivera, 29-anyos.
Nadiskubre kan suspek na pulis an saiyang katransaksyon kun kaya tulos ining nagdulag alagad nilamag kan kapulisan sa laog kan harong kaini kun sain naaktuhan man na nagpa-pot session an tulong kalalakihan na sinda Jimmy Rodriguez, Boyet Pableo, asin Antonio Pableo na anas residente kan nasambitan na lugar.
Nakumpiskar ki Rivera an sarong wallet na laog an buy bust money, duwang sachet nin pinagtutubudan na shabu, 13 empty transparent plastic sachets asin saro pang sadit na sachet nin shabu mantang nakua an iba pang drug paraphernalia asin duwang cellphone.
Segun ki Colico, haloy na nindang pigsususpetsaran si Rivera base naman sa naresibe nindang impormasyon na ini an pigbabagsakan nin droga na hale pa sa Manila. Tienempuhan suboot ninda na dakupon ini urog na nagdadangadang an kapistahan sa lugar asin posibleng bagsakan liwat ini nin droga asin maipalakop pa sa banwaan.
Isasairarom man an suspek sa tactical interrogation ngane na maaraman kun sisay pang personalidad an imbwelto sa iligal na aktibidad urog na kumpirmadong may contact ini sa Manila kun kaya dakula an involvement kaini sa illegal drug trade.
