Bagong resolusyon sa pagkanselar kan otorisasyon kan presenteng STL operator, liwat na isinumiter sa Junta Provincial kan Albay

LEGAZPI CITY- Nagpasar nin bagong resolusyon an Junta Provincial kan Albay sa obhetong mapakusog an kahagadan sa Philippine Charity Sweepstakes Office (PCSO) na pormal nang kanselaron an otorisasyon na ipigtao sa Lucky V Prime Enterprises bilang Authorized Agent Corporation (AAC) sa small town lottery operations sa provincia.
Sa intrevista kan Bombo Radyo Legazpi ki Vice Governor Harold Imperial, pursigido suboot an provincial government sa lakdang urog na wara man dakulang beneficio an paglaog kan STL operator sa Albay kun pag-oolayan an hibabang remittances siring man an pagpalyar na maotob an implementing rules and regulations.
Patotoo suboot digdi an makapirang beses na pagkakaarestar kan mga personahes kan nasabing korporasyon sa police operation huli sa dae pagsusulot kan tamang uniform asin identification card, bako prenumbered na tickets asin iba pang bayolasyon.
Dugang pa digdi an bako suficienteng ambag sa charity fund sa lokal na gobierno asin provincia siring man an pagiging ‘killing field’ kan Legazpi City makalihis na pagbabadilon an STL chairman sa Albay na si Alex Alemania mantang pag-iriba kaini an pigtutubudang nasa likod kan panggagadan.
Makusog man an pagtubod kan konseho na maaprubaran an request urog na bako sana man an Albay an nakaka-eksperyensya kaini.
Magigirumduman na Agosto kan nakalihis na taon kan mabungkal an isyu kun saen mismong si Governor Al Francis Bichara an nagpasugo na maghale an presenteng STL operator kun macausa man sana nin kariribukan sa Albay.