LEGAZPI CITY – Mawot ngonian kan bagong pamayo kan Tabaco City Police Station na tutukan an crime prevention asin crime solution.
Segun ki Officer-in-Charge Police Lieutenant Colonel Virgil Bibat sa intrevista kan Bombo Radyo Legazpi na isusustenir ninda an piggigibong lakdang kan nakaaging Chief of Police kan istasyon asin baguhon an dapat baguhon.
Saro suboot sa plano niyang ipa-otob iyo an maximum deployment kan saiyang mga personahes sa mga strategic areas nganing malikayan an mga insidente na kaka-imbweltuhan kan mga mararaot na elemento.
Nahihiling niya man na angat sa saiyang liderato ngonian an kun papano niya lalagpasan an nagin akomplisyemento kan saiyang sinunudan kun kaya gigibuhon niya an gabos nganing makapagtaong serbisyo sa saiyang nasasakupan.
Nagtao man nin kasuguan an opisyal sa saiyang mga personahes na magin ihemplo sa mga residentes kan Tabaco City huli ta sinda an permihang nahihiling sa mga kakalsadahan asin nganing makaguno nin magayon na integridad.
Pagsyerto niya man sa publiko na sa irarom kan saiyang liderato, magigin kakampi asin giya ninda an mga kapulisan.
Mantang patanid niya man sa mga nagkakasala na itama na nin amay an saindang mga pagkakasala huli ta wara sindang ibang gigibuhon kundi panimbagon an mga ini sa ley.
Naglalaom si Bibat na magigin magayon an saindang pag-iiribahan asin maseserbisyuhan nin matanos an saindang nasasakupan.
