LEGAZPI CITY- Ipigkokonsiderar na panibagong bentahe para sa City Government of Legazpi an composting pit na ititindog sa ciudad sa koordinasyon sa Okada Japan tangarig na makagibo nin organic fertilizer na an mga paraoma man an mabeneficio.
Sa intrevista kan Bombo Radyo Legazpi ki City Environment and Natural Resources Office (CENRO) head Buboy Cano, duwang taon naman suboot an nakakaihis kan ipigproponir an nasabing partnership na target an sanitary landfill.
Kasubagong aga man kan isagibo na an groundbreaking ceremony sa Brgy. Banquerohan na inatendiran pa kan mga lokal na opisyal asin 15 representante hale sa Japan.
Nagtutubod si Cano na dugang na oportunidad ini tangarig na magkaigwa nin high grade fertilizer para sa mga paraoma mantang dae naman ito-tolerar tangarig mapasabay na sa pagkolekta an mga biodegradable wastes na komon na ipigkakaag sa compost pit.
Pinag-iisipan pa man kan city government kun ibubukas ini sa iba pang mga lugar sa Albay alagad habo man suboot ni Mayor Noel Rosal na magsirbeng dumping site an ciudad.
Napag-aramang kasugpon man an nasabing proyekto kan chemical research sa septage management program sa ciudad.
Mientras tanto makalihis na mabayadan an dadarahon na mga makinarya, saka man sana pormalmenteng maitu-turn over an pasilidad sa Legazpi.
Inimbitaran man an mga opisyales kan LGU kaibanan an City Agriculture Office na magpasiring sa Japan sa Disyembre 6 tangarig na personal na mahiling an proseso sa nasabing facilidad.
