LEGAZPI CITY — Dae dapat na mamroblema an probinsya kan Albay sa suplay nin bagas huli ta bastante ini sigon sa National Food Authority (NFA.)
Sa intribista kan Bombo Radyo Legazpi ki NFA Provincial Manager Remy Dumawal, kinumpirmar kaining supisyente an stocks nin bagas sa nasambitan na probinsya.
Sa katunayan, igwa suboot nin inflow na kakaabot pa sana gikan sa Region 6 na parte kan saindang regional transactions.
Dugang pa ni Dumawal, ini man an peryodo kun sain nag-aani an dakol na paraoma kun kaya dakol na stocks an naglalaog sa ahensya.
Igwa man nin programa an departamento na base sa paliwanang kan provincial manager, nagbabakal sinda nin bagas direkta sa mga paraoma ngani na dae maapektaran an mga ini kan bumper harvest o an sitwasyon kun sain nagkakaigwa nin labi sa regular na ani an rice farmers na nagreresulta sa pagbaba kan demand sa merkado.
Sigon ki Dumawal, pigbabakal ninda nin P17 kada kilo an paroy asin may incentibo an mga kooperatiba para sa dry palay asin kun direktang pigde-deliver sa ahensya.
Klinaro man kaini na dae sinda nakiki-kompetensya sa mga private breeders huli ta sarong ahensya kan gobyerno an NFA na trabahong masierto an rice stability.
Enot nang ipinahayag ni Agriculture Sec. Manny Piñol na malabong magkaigwa nin rice shortage kun kaya dae na kaipuhan na mag-angkat nin bagas gikan sa ibang nasyun.
