LEGAZPI CITY— Arestado sa isinagibong anti-illegal drugs operation an sarong beautician sa Barangay Pating, Masbate City.
Binisto an suspetsado na si Roberto Hulaton alyas Lovely, 33-anyos na residente kan nasambitan na lugar.
Isinagibo kan pinagsararong elemento kan Masbate City Police sa pangengenot ni PSINSP Czar Pancho Avila, Police Intelligence Branch (PIB), Masbate Provincial Public Safety Company (PPSC) asin Regional Public Safety Batallion (RPSB) sa pakikipagtabangan sa Philippine Drug Enforcement Agency (PDEA) an search and seizure operation katakod kan project Double Barrel Reloaded kontra sa nasambitan na suspek.
Bitbit kan mga pwersang ini an search warrant na inisyu ni Hon. Judge Teofilo Tambago kan Regional Trial Court Branch 46 para sa pagbalgar sa Republic Act 9165 o an Comprehensive Dangerous Drugs Act of 2002.
Nagresulta an operasyon na ini sa pagkakakumpiskar sa sarong scatch tape kun sain nakadukot an duwang pakete nin pigtutubudang shabu.
Dinara si Hulaton sa istasyon kan pulisya kaibanan an mga narekober na ebidensya para sa magkakanigong disposisyon.
