LEGAZPI CITY—Matrayumpong naisagibo kan mga otoridad an pagpaotob nin search warrant kontra sa sarong lalaki huli sa ilegal na pag-iingat nin badil asin bala sa banwaan kan Libon, Albay.
Binisto an suspek na si alyas “Kim”, asin residente kan nasabing banwaan.
Ipinaotob an operasyon kan mga personahes kan Libon Municipal Police Station huli sa iniluwas na search warrant kan korte.
Sa ikinundusir na search and seizure operation an narekober an sarong pidaso nin ng caliber .38 revolver na may tolong bala, sarong halabang steel magazine na may 15 bala nin caliber .45 pistol, sarong pidasong hand grenade, asin sarong kolor na berdeng karton na may laog nin 27 pidaso nin bala.
Nakumpiskar man an mga ilegal na droga siring kan duwang pidaso nin heat sealed transparent plastic sachets na may laog na white crystalline substance na pigtutubudang shabu, sarong pidasong nakabugkos na transparent plastic sachet na may laog na white crystalline substance na pigtutubudang shabu, asin sarong pidasong nakatiklop na aluminum foil na may laog nin crystalline substance na pigtutubudang shabu na may pigkarkulong gabat na pocomas o menos 113.75 gramo asin may street value na P773,500.
Siring man an apat na pidasong transparent plastic sachets na may laog na tuyong dahon ng marijuana asin tolong pidaso na nakatiklop na papel na may laog nin pinatuyong dahon nin marijuana na may kabilogang gabat na 9.26 gramo asin street value na P2,963.20, magin iba pang drug paraphernalias.
Sa presente nasa kustodiya kan Libon MPS an suspek asin nakatalaang sunadan nin kasong pagbalgar sa Republic Act 10591 o ang Comprehensive Firearms and Ammunition Regulation Act, asin Republic Act 9165 o an Comprehensive Dangerous Drugs Act of 2002.
