LEGAZPI CITY—Nakumpiskar sa sarong lalaki an caliber .38 revolver asin hand grenade sa kinundusir na search warrant operation kan Masbate City Police Station sa Brgy F. Magallanes, Masbate City.
Segun ki Masbate City Police Station Chief of Police, Police Lieutenant Colonel Emerson Ecalnir, sa intrevista kan Bombo Radyo Legazpi, an suspetsado imbuelto man suboot sa mga panghahabon sa mga establisimiento.
Pigbalandra man suboot kaini an saiyang badil na nagkakawsa nin takot sa mga residentes.
Dugang kan opisyal na an gibo kan suspetsado pag nakakainom nin arak pagkaaga an sige suboot kaini na nakikipag-amigo.
Napag-araman na pigpapanao man suboot kaini an saiyang mga hinabonan asin nakapirang beses na man na nawawara nin pagkaaga an suspetsado sa saindang harong.
Mientrastanto, nasa kustodiya na kan Masbate CPS an suspetsado para sa magkakanigong disposisyon.
Sinabi man kan opisyal na padagos an saindang pag-monitor sa mga may pigtatago pang dae lisensyadong mga badil siring man sa mga may ilegal na aktibidades sa probinsya.
