LEGAZPI CITY– Dead on arrival sa ospital an sarong backrider makalihis na mahulog sa bangin an piglulunadan na motor sa Purok 2 Barangay Buang, banwaan kan Bacacay.
Nagluluwas sa imbestigasyon kan pulisya na pigmamaneho an nasambitan na motor ni Eleno Bermillo, 33-anyos, kasabay an mga backriders na sinda Jonathan Brutas, 28-anyos asin Niño Bierso, 20-anyos na mga residente kan nasambitan na barangay.
Pigbabaybay suboot kan mga ini an piot asin pababang dalan kan biglang mawaraan nin kontrol an drayber na si Bermillo na nagresulta sa pagkahulog kan behikulo sa bangin na may rarom na poco mas o menos 10 metro.
Nagsapar nin lugad sa manlaen-laen na parte kan hawak an biktimang si Brutas na binalo pang idalagan sa ospital alagad idineklarang dead on arrival kan nag-atindir na doktor.
Napag-araman man na dae nin plate number an ginamit na motor kan mga ini.
Sa ngunyan, ibinugtak sa kustodiya kan barangay kapitan kan Buang an nasambitan na behikulo mantang nagpapadagos an imbestigasyon kan pulisya sa nangyaring insidente.
