LEGAZPI CITY—Matrayumpong naisalbar kan mga otoridad an sarong babaeng may edad na na-trap sa saindang residencia huli sa pagbabaha na dara kan shearline sa Barangay San Isidro, Viga, Catanduanes.
Segun ki Catanduanes 2nd Provincial Mobile Force Company Police Community Affairs and Development – Police Non-Commissioned Officer Police Lieutenant Shara Denise Albaño Barrientos, sa intrevista kan Bombo Radyo Legazpi, isinagibo an rescue operation sa pakikipagtatabangan sa Municipal Disaster Risk Reduction Management Office kan nasabing banwaan.
Segun sa opisyal na nakaistar an nasabing babae sa lugar na kalimitang pigbabaha urog na kun padagos an mga pag-uuran.
Dugang kaini na an naisalbar na indibidwal an maluya na asin dae na makalakaw na maray kun kaya kaipuhan ining alalayan kan rescue team asin inebakwar sa mas salbadong lugar, na sa ngunyan an nasa maray na ining kamugtakan.
Mientrastanto, pigpagiromdoman man kan nasabing opisina an publiko urog na an mga nakaistar sa mga hababang lugar o flood-prone areas na mas magin alerto asin maagap durante kan maraot na panahon, importante an pagdangog sa mga abiso kan mga lokal na gobierno en kaso may mga patanid mapadapit sa pagbaha.
Pig-engganyar man ni Barrientos na tulos na i-report sa saindang opisina en kaso may mga may edad na, may helang o Person with Disability na nangangangaipuhan nin tabang nganing malikayan an anumang kalimidad o peligro.
