LEGAZPI CITY – Karsel an bagsak kan sarong babae makalihis magpuslit nin ilegal na kontrabando sa Matnog Port sa Provincia kan Sorsogon asin ipiglaog pa an iba sa pribadong parte kan saiyang hawak.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na nakuwa sa pagsasadiri ni alyas “Aira” an tulong heat-sealed plastic sachets kan pigtutubudang shabu na may pigkakarkulong gabat na singko gramos na may estimated street value na ₱20,000.
Basado sa saindang personahes, narisa kan mga port security personnel an kaduda-dudang hiro kan suspetsado sa routine inspection kun kaya tulos na isinairarom sa scanning antes nagpositibgo asin mantang pigsa-irarom ini sa body frisking an digdi na ini nagtuga na may dara pa ining ilegal na droga na nakalaog sa maselang parte kan saiyang hawak.
Napag-araman na an suspetsado an sarong computer operator na residente kan Tacloban City asin nagporbar na ibalyo an dara niyang kontrabando pasiring sa saindang lugar.
Pigtaram pa kan opisyal na naisakatupadan an operasyon sa pagtatarabangan kan PNP Matnog, Philippine Drug Enforcement Agency – Seaport Interdiction Unit Matnog, Philippine Coast Guard, asin Philippine Ports Authority para sa marhay na pagkapot kan mga ebidensya asin dokumentasyon.
Sa presente, nasa kustodiya na kan Matnog Municipal Police Station an suspetsado para sa magkakanigong disposiyon asin mahahampang sa pagbayolar sa Republic Act 9165 o an Comprehensive Dangerous Drugs Act of 2002.
