Sarong babae na naglaog sa imburnal nganing maghanap nin pagkaon an narescue sa Bula-Lagao Road sa General Santos City.
Nahiling kan sarong tricycle driver an babae na naghihibi asin naghahagad nin tabang kaya ipinaaram niya ini sa mga awtoridad.
Kasabay kan mga pulis, nagresponde an mga personahes hale sa Barangay Bula, Bureau of Fire Protection, asin City Disaster Risk Reduction and Management Office.
Hinale ninda an konkretong takop kan imburnal asin tinabangan na makaluwas an babae alagad huli ta nadidipisilan ining maghangos, tinawan ini nin breathing apparatus asin nakaluwas sa imburnal asin dinara sa ospital.
Binisto an babae bilang 23-anyos na residente kan Probinsya nin Cotabato.
Segun sa imbestigasyon, naglalangoy sa dagat an babae kan maglaog ini sa sarong kanal nganing maghanap nin pagkaon.
Nagkamang ini nin mga 300 metros asin nasasakitan na makabuwat giraray.
Nasa marhay nang kamugtakan an babae.
