Nagpaluwas an Australian government nin sarong travel advisory ngani pagiromdoman an mga namamanwaan kaini na mag-ingat sa pagbiyahe sa Pilipinas, orog na kun mapasiring sa Mindanao.
Ini huli suboot sa mga ‘security risks’ sa nasambit na rehiyon, siring kan mga huma nin terorismo asin mga serye nin karahasan.
Nakabugtak sa nasambit na advisory na naglalala an huma nin mga demonstrasyon asin civil unrest huli sa pirang serye nin mga pangyayari.
Huli digdi, pigpapagiromdoman kan gobierno kan Australia an mga namamanwaan kaini na ibitaran an magpasiring o makibahagi sa mga protesta asin mga darakulang pagtiripon huli ta posibleng magin bayolente an mga ini.
Igpatanid man digdi an posibleng huma sa mga transport asin essential service, kaya pig-aabisohan na sunudon an guidance kan mga lokal na otoridad.
Tinawan-duon man kan advisory na may huma nin pag-atake sa mga pampublikong lugar siring kan aeropuerto, hotel, shopping mall, restaurant, simbahan asin iba pang darakulang tourist area.
Kairiba sa mga lugar na ini an central asin western Mindanao, kairiba na an Zamboanga Peninsula, Sulu, asin Southern Sulu Sea kun saen halangkaw suboot an huma nin terorismo asin pangingidnap.
Enot nang nagluwas an U.S. Embassy na nakabase sa Pilipinas nin kaparehong advisory limang aldaw bago an advisory kan Australia.
Binisto man sa advisory kan Estados Unidos an suboot huma nin kidnap for ransom activities sa pirang mga lugar sa Western Mindanao siring kan Zamboanga del Norte, Zamboanga del Sur, asin Zamboanga Sibugay.
