LEGAZPI CITY-Apektado na an labi sa 300,000 hectares kan bushland sa Victoria, Australia huli sa mahiwasang bushfire na pinalala kan matinding heatwave, susog sa mga otoridad sa nasabing nacion.
Sa New South Wales, nagkapirang kasulo harani sa border kan Victoria an nasa emergency level na, an pinakamataas na alert level, na uminabot sa haros 40 degree celsius an temperatura, segun sa Rural Fire Service.
Segun sa mga otoridad, labi sa 130 istruktura an apektado, kaiba an mga kaharongan, kun sain damay an dai mababa sa 38,000 na kaharongan asin negosyo na nawaran nin kuryente huli sa danyos dara kan bushfire.
Ini na an pinakamatinding kasulo sa nacion poon kan 2019–2020 Black Summer fires, na tuminupok sa kasing-hiwas kan Turkey asin ikinagadan kan nasa 33 katawo.
Nagpatanid si Prime Minister Anthony Albanese na naghahampang an Australia sa sarong “extreme” asin “dangerous” fire conditions, partikular sa Victoria kun sain dakulang parte kan estado an idineklarang disaster zone.
Bilang pag-iingat isinarado na an kadakol na parke asin campground sa Victoria asin tulos na ipigsugo an pagebakwar sa mga residente sa lugar.
Padagos man an heatwave warning sa dakulang lugar kan Victoria, asin aktibo man an fire weather warnings sa kadakol na lugar sa nacion, kaiba an New South Wales, susog sa Australian weather bureau.
