LEGAZPI CITY — Preparado na an augmentation force na ipapadara kan Police Regional Office 5 (PRO5) katakod kan 31st Association of Southeast Asian Nations (ASEAN) Leadership Summit.
Segun ki PNP Bicol spokesperson S/Insp. Ma. Luisa Calubaquib, nagkaigwa na nin accounting kasubanggi asin nasa area na an mga personahes para sa deployment. Dae man kaini ipigbuyagyag an kabilugang numero kan nasabing mga personahes.
Mayor na trabaho kan mga ini sa summit an pagtatao nin security perimeter urog na sa mga piglalaomang militante na makondusir nin hiro-protesta.
Dugang pa kaining mantenido an full alert status kan PNP sa bilog na durasyon kan nasabing summit.
Naglalaom man an opisyal na magigin matoninong asin matrayumpo an nasabing aktibidad kun saen pig-aabangan na an pag-abot ni US President Donald Trump.
