LEGAZPI CITY-Nanindugan an pribadong piskal kan Kamara asin legal spokesperson na si Atty. Benjamin “Jay” Tolosa Jr., na wara nin konstitusyonal na basehan an sarong propwesto na haleon sa pwesto si Bise Presidente Sara Duterte alagad pigtutugutan pa man giraray na makadalagan sa maabot na pirilian.
Segun ki Tolosa, nakalaag sa Konstitusyon na enkaso mapatunayan na nagkasala an sarong opisyal sa sarong impeachment trial, pwedesir ining haleon sa pwesto asin permanenteng madiskwalipikar sa pagkapot nin anuman na posisyon sa gobierno.
Sa irarom kan Article 10, Section 3(7) kan Konstitusyon, an penalidad para sa impeachment pwedisir kabali an paghale sa pwesto asin pagdiskwalipikar sa pagkapot kan pampublikong opisina.
An opisyal pwedisir man na manimbag sa separadong mga kasong kriminal.
Tinawan duon ni Tolosa na dae nagbabago an posibleng penalidad, mantang saro na sanang article of impeachment an natatada sa kaso laban ki Duterte.
Mientrastanto, pinahimutikan kan kampo ni VP Duterte an mga alegasyon asin piglalaoman na maipresentar an saindang mga ebidensya mantang nagpapadagos an paglilitis sa Senado.
Piglinaw man kan prosekusyon na an saindang mga alegasyon, bako katumbas kan pagkakasala, nin huli ta an korte sa pag-impeach kan Senado, iyo an magibo kan desisyon basado sa ebidensya asin sa Konstitusyon.
