LEGAZPI CITY-Lifted na an ipinaluwas na warrant of arrest kontra ki Vice President Sara Duterte, makalihis na magpiyansa ini ngonian na aldaw sa Quezon City Regional Trial Court, susog sa saiyang abogado na si Lawrence Lim.
Nilinaw man kan legal counsel ni Bise Presidente Sara Duterte na si Atty. Paul Lawrence Lim na warang anumang special treatment an naresibe ni VP Sara kan siya magsairarom sa pormal na booking procedure sa Quezon City Regional Trial Court.
Pigpaliwanag kan abogado na an Bise Presidente nagsumiter kan sadiri niyang retrato sa husgado para sa kinakaipuhan na record, mantang maayos asin pormal na kinua an saiyang mga fingerprint susog sa eksistidong legal na proseso.
Kasabay kaini, pormal na pigkumpirma ni Lim na lifted o set aside na an warrant of arrest na ipinaluwas kontra ki VP Sara Duterte makalihis na matrayumpong maisangat kaini an kinakaipuhan na piyansa para sa saiyang kasong grave threats.
An pag-atubang sa korte kasunod kan dati nang pinanindugan kan Bise Presidente na ipinahayag ni Lim, kun saen sinabi kaini na anumang isyu kan hurisdiksyon sa kaso, warang intensyon si Duterte na mag dulag sa ley asin padagos na gagamiton an gabos niyang legal remedies.
Huli sa pag-file nin piyansa asin pag-deposito kan magkakanigong kantidad sa korte, temporaryong pinaluwas an Bise Presidente asin nalikayan an pagkakakulong mantang padagos na dadangugon an merits kan saiyang kaso.
Mientras tanto, makalihis na magpiyansa, sinabi mismo ni VP Sara na igwa siyang pagkahadit mapadapit sa kaligtasan kan saiyang buhay.
