Nakatalaan na basahan nin sakdal ngunyan na Biyernes, Setyembre 11, 2026, si Vice President Sara Duterte sa Quezon City Regional Trial Court katakod kan mga kasong grave threats na saiyang pinagkakahampang.
Pinaglalaoman na personal na maatendir an bise presidente ngani na pormal na magsunad kan saiyang plea na guilty o not guilty sa hampang kan korte.
Tinawan duon kan abogado kan bise presidente na si Atty. Michael Poa na obligado asin kinakaipuhan na mag-atendir kan sarong akusado sa pormal na pagbasa nin sakdal.
Antes an nakatalaan na arraignment, enot nang nagrani si Duterte sa Korte Suprema ngani na hagadon na mapawarang bisa asin maibasura an mga kaso kontra saiya asin magin sa inisyung warrant of arrest kan Quezon City RTC.
Obheto kan saiyang ipigsunad na Petition for Prohibition na may kaibanan na aplikasyon para sa Temporary Restraining Order (TRO) na pugulon an prosekusyon asin an korte sa pagpapadagos kan anuman na aksyon dapit sa kaso.
Nagsumiter man an saiyang kampo nin Urgent Motion to Resolve Application for TRO ngani na marikas na maresolbar kan Korte Suprema an petisyon antes pa man magpuon an pagbasa nin sakdal ngunyan na aldaw.
Mayor na rason kan kampo ni Duterte sa apela an paghagad linaw sa Korte Suprema dapit sa sakop asin limitasyon kan immunity hali sa demanda kan sarong nakatukaw na impeachable officer.
Nagtetenir man na pusog an paninindugan kan Department of Justice (DOJ) na an presidente sana kan nacion an solamenteng opisyal na igwang eksempsyon o immunity from suit sa irarom kan ley.
Nahahampang si Vice President Sara sa tulong counts nin kasong grave threats katakod kan suboot pagbabanta niya sa buhay ninda Presidente Ferdinand Marcos Jr., First Lady Liza Araneta-Marcos, asin dating House Speaker Martin Romualdez.
