LEGAZPI CITY – Ipinagirumdom kan pamayo kan Albay Public Safety and Emergency Management Office (APSEMO) an totoong mandato kan mga empleyado kan gobierno na udok sa boot na pagsiserbisyo-publiko.
Napag-araman na kaibanan si APSEMO chief Dr. Cedric Daep sa siyam na tatawanan nin honra bilang Dangal ng Bayan awardee kan Civil Service Commission (CSC) sa Palasyo Malakanyang sa Martes, Setyembre 10.
Sa intrevista kan Bombo Radyo Legazpi ki Daep, dakulang honra an magresibe kan pinakahalangkaw na award na ipigtatao sa government service na ipigpasalamat man kaini sa mga staff kan oficina, komunidad asin media na nagin katabang sa epektibong pagtatrabaho.
Dugang pa ni Daep na simple sana an nagin lifestyle sa pagtuntong sa gobierno, may apolitical na servicio na tutok an posibleng biktima asin bako posibleng botante; institution-oriented asin bako personality-oriented; solution-oriented sa pagcortar kan mga problema asin service-oriented bako profit-oriented.
Nagin department head si Daep sa edad na 33-anyos asin mayor na awtor kan pagmukna kan APSEMO na nagin modelo sa pagtitindog nin mga disaster management councils sa bilog na Pilipinas sa paagi kan Republic Act 10121.
Nakatalaan namang magretiro si Daep makalihis na magtuntong sa government service kan 1986 kaya tatawanang-konsentrasyon suboot kaini an training sa mga maribay na opisyal asin pag-otob sa ‘zero casualty goal’.
