LEGAZPI CITY- Nagpaabot nin pakidumamay an Albay Power and Energy Corporaton (APEC) sa 92 na pamilyang nasuluan sa Brgy 28 Victory Village sa syudad kan Legazpi.
Sa pahayag ni Hazel Morallos, tagapagtaram kan APEC, sinabi kaini na nagsagibo nin inspeksyon an saindang technical team sa nasambitan na barangay kun sain nadiskubreng overloaded na wire an ginikanan kan kasulo.
Ini suboot an nagin kawsa kan pagkalayo kan poste na nakadamay sa mga harong.
Pinatotoohan ni Morallos an pahayag ni Victory Village Barangay Captain Antonino Loveriza na haloy na nindang ipigdulok sa APEC an mga problema sa poste kan kuryente.
Alagad depensar ni Morallos, inaksyunan kan kooperatiba an reklamo kan barangay asin nirehabilitate an mga raot na linya asin poste.
Ineksplikar kaini na nagkundusir sinda nin massive disconnection sa lugar kun sain nasa 224 na pamilya an naputulan nin kuryente.
97 sana suboot digdi liwat na nagpatakod sa saindang opisina.
Sa ibong kaini, habo man suboot nindang basulon an siisay man sa nangyaring kasulo asin presente nang nakikipagkooperar sa imbestigasyon kan Bureau of Fire Protection (BFP.)
Magigirumduman na an APEC an pigbabasol kan mga biktima kan kasulo magin kan mga opisyales kan barangay sa pagkaabo kan haros 100 na harong sa lugar.
