LEGAZPI CITY-Naarestar an apat na indibidwal huli sa iligal na tupada sa ikinasang operasyon kan mga otoridad sa ciudad kan Legazpi.
Segun kay Police Master Sergeant Carlos Paña, sa intrevista kan Bombo Radyo Legazpi, na naarestar ini bandang alas 2:15 nin hapon kan Agosto 23, 2025.
Binisto an mga ini na sinda alyas “Amon”, “Mando”, alyas “Jong” na pararehong residente kan Barangay Taysan Legazpi City, asin man si alyas “Jolito” na residente kan Legazpi City.
Nagbabayolar an mga ini sa Republic Act 1602 o an Anti-gambling law katakod an ilegal cockfighting.
Sa presente nasa kostudiya na kan Legazpi City Police Station an mga nadakop na persona asin pighahalat pa an resolusyon kan piskalya para sa kampatang piyansa kan mga ini.
Sinabi man kan opisyal na posibleng hababa na sa P30,000 an magigin piyansa kan mga ini depende kun kabale sinda bilang sarong indigent.
Mientrastanto, pagirumdom ni Paña sa publiko na mahigot na ipinagbabawal an iligal na tupada asin laoman ninda na maibitaran na ini sa ciudad kan Legazpi.
