LEGAZPI CITY – Nagpositibo sa African Swine Fever (ASF) an apat na banwaan sa provincia kan Catanduanes.
Segun ki Department of Agriculture Bicol spokesperson Lovella Guarin sa intrevista kan Bombo Radyo Legazpi na nairehistro an mga bagong kaso sa mga banwaan kan Baras, Bato, San Andres asin Virac makalihis na magpositibo an sampulo sa onseng blood samples kan mga orig.
Hale man sana sa sainda an mga orig na positibo sa helang nin huli ta dae man nagpapalaog an nasambitang provincia nin mga orig na warang kaukolang dokumento.
Magsasagibo pa sana nin depopulation sa mga orig na positibo nin helang nganing mapugulan an paglakop asin danyos na pwedesir ikawsa sa mga para-orig.
Pigtaram pa kan opisyal na pigpapaotob na an mahigot na biosecurity measures, border control asin surveillance mantang makolekta pa nin mga blood sample sa mga orig na nakapalaog sa 1 meter radius zone kan mga naunambitang banwaan.
Bawal na man suboot na magpaluwas nin produktong karne an mga banwaan sa laog kan 90 days alagad pwedesir na dae na tapuson an nakatalaang aldaw kun mahihiling sa resulta na wara nang aktibong kaso an mga orig sa saindang lugar.
Sa ibong kan mga aktibong kaso, dae man nahilingan nin paghalangkaw sa mga presyo kan karneng orig sa Catanduanes.
Sa presente, ASF safe na an provincia kan Albay asin wara nang restriction sa pagpaluwas nin mga meat products.
Pangapodan ni Guarin sa mga hog raisers sa mga banwaan na may positibong kaso na sunudon an saindang pigpapaotob na biosecurity meassures arug kan pakaunon sana nin feeds an mga orig, pag sanitize asin dae magpalaog ki kun sisay man sa kulungan asin tulos na makipagkoordinar sa provincial veterinarian kun na-obserbaran na matamlay asin warang ganang magkaon an saindang atamang orig.
