Gadan an apat na katawo mantang 79 an nalugadan sa inilunsar na airstrike kan Israel sa sarong establishimento sa ciudad nin Gaza sa Palestine.
Segun sa militar kan Israel, ginibo ninda an airstrike ngani na mapugolan an posibleng pag-atake kan militanteng grupong Palestinian Islamic Jihad na nagtatago sa ciudad.
Kaiba sa mga nagadan an saro sa mga senior commanders kan militanteng grupo mantang naenot naman na naarestar an 19 miyembro kan Islamic Jihad.
Bilang pagbalos, sunod-sunod man na nagpalayog an Palestine nin 160 mga rockets alagad kadaklan sa mga ini an na-intercept kan iron dome kan Israel kung kaya diit sana sa mga residentes an nalugadan.
Ini na an ika-duwang aldaw na balosan nin pag-atake kan duwang nasyun na nagpuon makalihis na arestaron kan Israel an saro sa mga Islamic Jihad commander sa West Bank.
Magigirumduman na Mayo 2021 kan huring magribayan nin mga pag-atake an Israel asin militanteng grupo kung sain 250 na mga Palestinian an nagadan mantang 13 sa lado kan Israel.
Napundo sana an kariribokan kan magkaigwa nin ceasefire an duwang nasyun.
