LEGAZPI CTY- Bagsak sa karsel an apat na persona sa isinagbong buy bust operation kan mga otoridad sa sarong drug den sa Purok 1B, Barangay Puro, Legazpi City.
Sa intrevista kan Bombo Radyo Legazpi kay PDEA Albay Provincial Officer Noe Briguel, target kan operasyon an drug suspect na si Christopher Alamil 39 anyos, na dati ng nagsurinder sa Oplan Tokhang alagad nagbalik sa kalakaran kan iligal na droga asin nagpapadalagan kan nasabing drug den.
Positibong nakabakal an police puseur buyer nin droga sa suspek asin narekober an nasa pitong sachet kan shabu na nagkakantidad nin nasa P102,000.
Naaktohan man sa lugar mantang naggagamit kan droga sinda Rebecca Arias Cadalin, 39 anyos, Mark Anthony Volante, 27 anyos asin Dante Cariño Jr, 35 anyos na inarestar naman kan mga otoridad.
Alagad sa pag-inspeksyon kan mga otoridad, nahiling pa an tolong persona na nagbibisita sa drug den kung kaya inarestar naman an mga ini.
Sa ngunyan nakakarsel na an mga suspek na nahahampang sa kasong pagbayolar sa Acta Republikanumerado 9165 o an Comprehensive Dangerous Drugs Act of 2002.
