LEGAZPI CITY – Nagsairarom na sa public hearing an ordinansang isinumite ni City Councilor Jaime Andes dapit sa pagbabawal nin vandalism sa syudad kan Legazpi.
Iprinisenta kan pamayo kan committee on social legislation an draft kan resolusyon na “Anti-Vandalism Ordinance of the City of Legazpi” kun saen tinukar digdi an mga ibabawal, penalidad asin iba pa.
Segun ki Andes, kadakol na an nagiging biktima kan vandalism sa syudad arog kan mga pampubliko asin pribadong establisyimento, tinampo, asin maging mga behikulo na dae dapat suboot pagpabayaan.
Kaiba sa mga mapautob kan ordinansa an Legazpi PNP, Public Safety Office, City Engineering, asin an mga barangay officials.
An mga barangay, City Social Welfare and Development Office, City Tourism Office, General Parents-Teachers Associations asin kapulisan sa syudad an makondusir man nin information dissemination drive dapit sa anti-vandalism sa Legazpi.
An mga madadakop sa enot na offense an mamulta nin P2000 o pagkakulong nin anom na bulan, P4000 man an multa asin pagkakulong nin 8 bulan an para sa second offense asin P5000 na multa asin pagkakulong nin sarong taon sa third offense.
Magiging epektibo man an ordinansa makalihis ining maaprubaran asin makalihis maipost asin maisapubliko sa dyaryo sa lokalidad nin tulong beses.
Sa Lunes, pag-oolayan pa nin maray an nasabing propuestong ordinansa hasta sa maaprubaran ini.
