LEGAZPI CITY- Nagkonduris nin anti-HIV and Aids awareness campaign an Catanduanes State University, na inorganisar kan alumni kan unibsersidad.
Segun ki Catanduanes State University President Dr. Patrick Azanza sa intrevista kan Bombo Radyo Legazpi na nakipag koordinar an mga organizers sa Municipal Health office kan Virac asin iba pang mga stake holders.
Inatendiran man ini kan mga estudyante kan unibersidad kaibanan an manlain lain na mga sektor.
Paliwanag kan opisyal na obheto kan aktibidad na maipaliwanag sa publiko kun papano maiitibaran an HIV, mga paagi kan pagbulong kaini asin an pagtatao nin tamang mga impormasyon dapit sa mga salang pagtubod na nagkakawsa nin stigma sa komunidad na nagresulta sa diskriminasyon.
Ipinaaram man sa mga partisipantes na igwang libreng mga bulog na ipigtatao an Department of Health.
Sa paagi kaini, nagtutubod an opisyal na magkakaigwa nin bastanteng kaaraman an publiko asin matabangan an mga biktima kan nasabing helang.
