LEGAZPI CITY-Nauli sa kariribukan asin engkwentro sa pagultanan kan mga raliyista asin kapulisan an mahiwasang anti-G7 protest sa Geneva, Switzerland kan Hunyo 14, an bisperas kan opisyal na pagpoon kan G7 Summit.
Uminabot sa pigkakarkulong 20,000 katawo an nakisumaro sa martsa na inorganisa kan coalition na “No-G7”.
Dai mababa sa 600 miyembro kan radical “Black Bloc” an naghalo sa matoninong na rally asin pasimuno kan kadahasan.
Sumiklab an hiro-protesta sa sarong parke harani sa Lake Geneva bago pa man maglala an sitwasyon sa sentro kan ciudad.
Nagresulta nin danyos an protesta kun saen sarong luxury car pa an sinilaban asin tuluyang sinulo sa hampang kan central bus stop.
Pinasa man kan mga raliyista an mga bintana kan opisina kan United Nations (UN), partikular na an International Telecommunication Union (ITU).
Siring man an mga salming kan mga pribadong bangko asin an opisina kan kumpanyang PricewaterhouseCoopers (PwC).
Nagresponde man an Swiss riot police asin guminamit nin tear gas asin water cannons ngani itaboy an marahas na grupo.
Nagpakalat na man nin 4,000 military personnel an Switzerland asin sinarado an haros gabos na border crossings pasiring sa France bilang pag-iingat.
Basado sa mga report, nag-poon an dagit kan mga aktibista sa saindang pagtutol sa konsentrasyon kan yaman kan mga mayayamang nacion, mantang nawawalat an mga tios.
Pigbabatikos man ninda an mga polisiya ni US President Donald Trump mapadapit sa ekonomiya, pagpataw nin mga taripa asin climate issues siring man an protesta ninda laban sa nangyayaring gera asin pagtatao nin suporta para sa direchos kan mga Palestinian.
