LEGAZPI CITY – Pigresibi na kan Gobierno Provincial kan Catanduanes an anom sa doseng brand new four-wheel drive tractors na saindang pighagad kay Department of Agriculture Secretary Francisco Tiu Laurel Jr.
Segun ki Catanduanes Governor Patrick Azanza sa intrevista kan Bombo Radyo Legazpi na antes pa man siya magtukaw sa posisyon an ginibo niya nang ka-olayon an kalihim nganing mapa-uswag an sektor kan agrikultura sa saindang provincia.
Narisa niya kaya na kadaklan sa saindang mga namamanwaan an nakadepende sa pag-aararo kun kaya magayon suboot na matawan nin programa an saindang mga paraooma sa irarom kan Rice Competitiveness Enhancement Fund (RCEF).
Kabale sa saindang napagkasunduan na gabos na munisipalidad sa saindang provincia an makakaresibi nin tig-sarong tractor na pwedesir gamiton sa irarom kan programa na naenot na niyang tinukar sa saiyang first 100 days report.
Pigtaram pa kan Gobernador na kabale ninda sa programa an Philippine Center for Postharvest Development and Mechanization Regional Field Office V, Provincial Agricultural Services Office, asin Provincial Agricultural and Biosystems Engineering Office.
Pagsyerto man suboot sa sainda kan Kalihim na maabot an ikaduwang batch kan mga tractor sa masunod na taon asin an saiyang commitment sa mga paraooma kan Catanduanes.
Pagdoon pa ni Azanza na padagos man an saiyang pakikipag-olay sa mga magkakanigong ahensya kan gobierno nganing maghagad nin tabang sa saindang mga paraooma, parasisira, asin mga abakaleros na naapektaran kan nakaaging Bagyong Uwan.
