LEGAZPI CITY – Salbadong naihawas an anom na lunad kan duwang motorized banca na naglubog sa kadagatang sakop kan Brgy. Poblacion, banwaan kan Rapu-Rapu, Albay.
Napag-araman na ipinaabot kan saro sa mga pasahero sa nasabing mga banca an impormasyon sa Legazpi City PNP na ipigderihir man sa Rapu-Rapu PNP hasta makaabot sa Philippine Coast Guard.
Sa intrevista kan Bombo Radyo Legazpi ki PCpt. Wenifredo Padilla, hepe kan Rapu-Rapu PNP, biyaheng Brgy. Morocborocan an nasabing mga motorized banca hali sa Brgy. Poblacion.
Lunad kaini an apat na estudyante asin duwang persona na nasa tama nang edad alagad nasa katahawan kan dagat kan magka-aberya an behikulo.
Saro sa mga banca an naabutang nakalubog na an kabangang parte kan lawas sa dagat urog na madistansya man an lugar na pinaghalian kan mga otoridad sa pinangyarihan kan insidente.
Segun pa sa hepe, piguguyod man an mga ini kan duwa pang bangka kan maabutan.
Aminado man an hepe na igwang nakabanderang gale warning sa parte kan Albay kasuodma kaya dapat na dae tinugutan na maglawod an mga nasambit na behikulong pandagat.
