LEGAZPI CITY- Inagyat ngonian ni House Majority Leader Rolando Andaya Jr. si Budget Secretary Benjamin Diokno na dae magdemitir sa pwesto katakod kan kontrobersiya asin mga akusasyong ipigbabato sa suboot “insertions” sa 2018 asin 2019 budgets.
Kasunod ini kan pag-adopt kan House Resolution Number 2365 na akda ni Minority Leader Danilo Suarez kasuodman kun sain ipigpaparekonsidera kan mga lehislador ki Presidente Rodrigo Duterte an pagdesignar ki Diokno.
Sa intrevista kan Bombo Radyo Legazpi ki Andaya, simbagon muna suboot ni Diokno an gabos na hapot sa isasagibong session urog na imposible man na wara ining aram sa mga proyektong nag-agi asin inimprenta kan DBM.
Magigirumduman na ipigtatakod an cabinet member sa pagpabor sa bilyon-bilyong projects sa nagkapirang lugar sa nacion urog na haros magkakasabay na nai-award sa kontratistang CT Leoncio Construction and Trading na hale pa sa Bulacan.
Patotoohan man muna suboot ni Diokno an sinasabing competence asin integridad na mismong sa ngimot pa kaini naghali sa paagi kan pagtataong kalinawan sa isyu.
Nagpatutsada pa si Andaya na dae na magtago sa likod kan presidente si Diokno asin ibitaran man an pag-imbwelto asin pagpasa kan sadiring kagibuhan sa Kongreso.
