LEGAZPI CITY—Pighayag kan ACT Teachers Partylist na an amay na pag-anunsyar sa pagdalagan bilang presidente sa 2028 ni Vice President Sara Duterte an sarong paagi nganing malihis an orolay mapadapit sa mga isyu na dapat panimbagan kan pamilya Duterte.
Segun ki ACT Teachers Partylist Representative Antonio Tinio, sa intrevista kan Bombo Radyo Legazpi, na dapat man giraray na panimbagon an bise sa saiyang pandarambong sa confidential funds bilang bise presidente asin dating kalihim kan Department of Education.
Dugang niya na boot-sabihon kan pagdalagan kan bise an wara nang pagpapanggap asin an gabos na saiyang piggibo an pamumulitika asin pangangampanya.
Sinabi pa ni Tinio na an saiyang pag-anunsyar an nagkataon man bago an saiyang impeachment proceedings sa House of Representatives asin sarong patanid o paninindak man sa mga kongresista.
Hapot man kan opisyal na kun an indibidwal na dae mapagkakatiwalaan sa paggamit nin confidential funds bilang bise presidente an kun mapagtitiwalaan man ba ini bilang sarong presidente.
