LEGAZPI CITY- Matrayumpong nabawi kan mga otoridad an sarong 6 anyos na joven na nahostage kan saiyang sadiring ama sa Barangay Layon, Ligao City.
Napag-araman na mismong an lola kan biktima an nagpasiring na hepatura kan pulis ngani na ireport an panghohostage kan suspek na si Ferdinand Arnesto 29 anyos sa laog kan saindang kwarto gamit an sarong kutsilyo.
Sa intrevista kan Bombo Radyo Legazpi kay Pol. Capt. Dexter Panganiban, pighahagad suboot kan suspek na makaulay an saiyang nakasuway na misis kung kaya nakipagkoordinar an PNP sa agom kaini na nakaistar na sa Barangay Tuburan.
Inabot pa nin labi sa duwang oras an negosasyon kan mga otoridad antes na matrayumpong mapasurindir an suspek asin iluwas an kapot kaining biktima na dae man nakulogan sa insidente.
Sa ngunyan, nasa pangataman pa kan mga otoridad an 6 anyos na joven para sa assesment sa posibleng trauma na sinapar kaini, mantang nakakarsel naman an suspek na pigsasairarom pa sa imbestigasyon.
