Nahahampang sa panibagong mga reklamong administratibo asin kriminal an tinanggal na alkalde kan Bamban, Tarlac na si Alice Guo asin 35 iba pang opisyal na may kinaaraman sa suboot iligal na pag-convert kan sarong kadagaan sa Philippine Offshore Gaming Operator (POGO) property asin dae pagbabayad kan tamang buwis.
Segun ki National Bureau of Investigation (NBI) Director Jaime Santiago, isusunad an nasabing reklamo sa Office of the Ombudsman laban kina Guo, sa dating bise-alkalde kan Bamban asin mga konsehal kaiba na an mga opisyal na nagserbi bago an termino ni Guo.
Ipinaliwanag kan NBI chief na an mga transaksiyong imbuelto digdi an maikokonsiderar na “grossly disadvantageous” huli ta gikan sa appraised value na P3.9 billion, an ibinayad sana suboot an 10,000 para sa real property tax asin wara man suboot nin bidding.
Kaiba sa mga reklamong kakahampangon kan mga ini an pagbalgar sa Anti-Graft and Corrupt Practices Act at Article 216 kan Revised Penal Code na nagpapadusa sa mga opisyal na may prohibited interests.
Mahahampang man an mga ini sa administrative charges huli sa gross misconduct, serious dishonesty asin conduct prejudicial to the best interest of the service.
