Preparado an 21-anyos na si Alex Eala na isakripisyo an pagpartisipar sa dakulang WTA tour ngani na masungkit an pangaturugan na bulawan na medalya sa 20th Asian Games sa Aichi-Nagoya, Japan.
Segun ki Philippine Lawn Tennis Association (Philta) executive director Tonette Mendoza, makikipag koordinar sinda sa WTA ngani na tugutan si Eala na laktawan an China Open na nakatalaan sa Setyembre 30 hasta Oktubre 11.
Nag-o-overlap kaya an iskedyul kan China Open, na sarong prestihiyosong WTA 1000 event na igwang dakulang papremyo asin ranking points, sa mismong Asian Games puon Setyembre 27 hasta Oktubre 3.
Sa ibong kan dakulang kantidad nin premyo asin importanteng puntos na posibleng mawara saiya sa WTA, bilog suboot an desisyon kan Filipino tennis star na magkawat para sa nacion, anuman an maging kasimbagan kan alyansa.
Makalihis makakuwa nin tansa kan 2023 Hangzhou Asian Games, mas dakula an tsansa ngunyan ni Eala ngani na makuwa an pigmamawot na bulawan na medalya.
Kun magtrayumpo asin magkampeon, si Eala an magigin pinaka enot na Pilipinong tennis player na mag-uuli nin titulo sa Asian Games puon kan manggana si Johnny Jose kan 1962.
