LEGAZPI CITY- Mawot paimbestigaran ngonian kan sarong bokal sa Junta Provincial kan Albay an pigsasabing anomaleya asin korapsyon sa operasyon kan quarry sa provincia.
Ipig-eksplikar ni Albay 3rd District Board Member Pem Imperial sa intrevista kan Bombo Radyo Legazpi an conservative estimation kaini na susog suboot sa report sa Junta Provincial kan nakaaging Pebrero na nagpapahiling kan pigsasabing iregularidad.
Segun sa bokal, pigsasabing pigpapatungan an prevailing price kan aggregates o extracted quarry materials sa provincia na P50 per cubic meter nin P7 sa lokal asin P25 para sa mga ipigluluwas alagad warang ipigtataong resibo.
Kun susumahon pa segun ki Imperial na sa 2 million cubic meters na aggregates na naipabakal sa anom na bulan katampad kaini an P90 million na koleksyon alagad nasa poco mas o menos P30 million man an kwestiyonableng ‘additional’ na kantidad na dae pa madeterminaran kun sain napapaduman.
Dugang pa ni BM Pem na dae na makayanan an labing kulog kan boot sa mga nareresibeng agrangay na ipigbabasol man sa mga opisyal kan Junta na nagbubuta-butahan suboot sa mga reklamo.
Pagtataong-duon pa kan opisyal na obheto sana kan pigmamawot na imbestigasyon na maaaraman an katotoohan sa istorya na en kaso magpositibo inapod pa kaining ‘biggest corruption scandal’ sa provincia kan Albay.
