LEGAZPI CITY- Sinierto kan pamayuhan kan Albay Electric Cooperative na igwang nakalatag na mga plano ngani na dae maapektaran an mga delegado kan Palarong Bicol 2025 sa pagpapaotob nin haros 48 oras na power interruption sa ciudad kan Legazpi.
Ini an katakod kan pagpupuon na kan pag-abot sa ciudad kan Legazpi kan mga delegado para sa nasabing sporting event.
Segun ki Albay Electric Cooperative spokesperson Anj Galero sa intrevista kan Bombo Radyo Legazpi na nakipag olay na an saindang lado sa Department of Education asin sa lokal na gobierno kan Legazpi City.
Napag-araman na napagkasunduan an pagpapasubli kan korporasyon nin mga generator sets sa mga billeting centers na maaapektaran kan nasabing brown out.
Aminado man an opisyal na dakol sindang nareresibeng agrangay hali sa mga konsumidores alagad pigduon kaini an importansya kan nasabing power interruption.
Paliwanag ni Galero na magkakaigwa kaya nin testing kan 20 mva power transformer sa Bitano substation asin repair kan mga ekipahes kan kooperatiba.
