LEGAZPI CITY- Inasegurar kan Albay Electric Cooperative na nakahanda an saindang lado sa pagtatao nin dire-diretsong suplay nin kuryente sa aldaw kan pirilian sa Mayo 12.
Ini an sa tahaw kan pagkahadit kan publiko na magkaigwa nin power interruptions sa panahon kan pagboto kan mga namamanwaan.
Segun ki Albay Electric Cooperative Spokesperson Anj Galero sa intrevista kan Bombo Radyo Legazpi na antes pa man an eleksyon, nagkondusir na nin preparasyon an korporasyon.
Kaibanan sa mga ini an pagsasagibo nin hot spot correction, pagkakaigwa nin load monitoring sa mga transformers asin distribution lines na harani sa mga voting centers asin iba pa.
Paliwanag kan opisyal na handa man sinda enkasong igwang dae pinaglalaoman na mga insidente.
Dugang pa kaini na igwa man na mga personahe na idi-deploy sa lambang munisipyo asin ciudad urog na sa may mga darakulang polling centers.
