LEGAZPI CITY – Tinawan pagbisto kan Gobierno Provincial kan Albay an tulong Albayano topnotchers sa kakatapos pa sanang May 2024 Licensure Examination for Professional Teachers.
Segun ki Monica May Napod sa intrevista kan Bombo Radyo Legazpi na maugma siya huli ta natawan nin pagbisto kan provincia an saindang naguno na trayumpo.
Magigirumdumang nasungkit ni Monica May Cruz Napod an ika-apat na pwesto na may 93.80% para sa Elementary Education, mantang si Jed Alih Nacional Moraleda an top 8 na may 92.40% asin si Shaina Marie Q. Cosa bilang top 9 na may nakakuwa man nin 92.20% sa Secondary Education.
Mahihiling man suboot an pagigin proud ni Albay Governor Glenda Bongao sa saindang nagin trayumpo.
Dae niya piglaoman an resulta huli ta haros rinibo suboot an mga kapwa niya estudyante na nagtake asin aminado ini nadifisilan siya sa mga kahapotan kan nasabing eksmaninasyon.
Paghistorya pa kaini na dae man nagin madali an saiyang preparasyon urog nang isinakripisyo niya an saiyang trabaho nganing magtaong dalan sana sa saiyang pagreview.
Balak niya na kuta suboot na magtake kan setyembre kan nakaaging taon alagad dae siya nakasumite nin aplikasyon sa tamang oras.
Nagin inspirasyon asin sandigan niya man an saiyang pamilya sa oras na pinangluluyahan man siya nin boot.
Abiso ni Napod sa mga estudyanteng nagkukuwa nin kursong edukasyon partikular na an ma-take sa September 2025 Licensure Examination for Teachers na kaipuhan an pagigin maigos sa pagreview nganing dakol an mababalon na impormasyon pag-abot sa mismong aldaw kan eksaminasyon.
